दसैंअघि नै मधेस आन्दोलनका मुद्दा फिर्ता : गृहमन्त्री

आश्विन १, २०७३- सरकारले मधेस आन्दोलनका क्रममा मुद्दा लागेका ३ सय ७४ जनाको मृद्दा दसैंअघि फिर्ता लिने प्रक्रिया अगाडि बढाएको छ । गृहमन्त्री विमलेन्द्र निधिका अनुसार उनीहरूमाथि १ सय ६० वटा मुद्दा छन् ।
मधेसी मोर्चासँगको सहमतिअनुसार उनीहरूमाथिको मुद्दा फिर्ताको प्रक्रिया अगाडि बढाउन महान्यायाधिवक्ता, मोर्चाका तर्फबाट कानुन व्यवसायीहरूसँग छलफल चलिरहेको छ । मन्त्रालयमा शनिबार सुरक्षासँग सम्बन्धित सञ्चारकर्मीसँगको भेटमा गृहमन्त्री निधिले दसैंअघि नै मुद्दा फिर्ताको प्रक्रिया टुंग्याउने तयारी भएको बताए ।
मोर्चाको सूचीअनुसार ५२ जनालाई सहिद घोषणा गरेर उनीहरूका परिवारलाई १० लाख दिइसकेको र छुटेका भनिएका १२ जनालाई सहिद घोषणा गर्न छानबिन भइरहेको पनि मन्त्री निधिले जानकारी दिए । उपचार खर्चको रकम भुक्तानीका लागि भने बिलसहितको विवरण मागे पनि मोर्चाले सरकारलाई उपलब्ध नगराएको उनले बताए ।
Source: http://kantipur.ekantipur.com